Панаѓуриште или Св. Константин и Елена — археолошко наоѓалиште во велешкото село Свеќани. Претставува средновековна црква и некропола. На 3 км југозападно од селото, на североисточната страна на ридот Св. Констатин и Елена се наоѓаат остатоци од манастирска црква изградена кон крајот на IX век и на почетокот на X век. Подоцна, во XIII и XIV век, црквата била преѕидана и доградена. Од нејзината западна страна се гледаат гробови со конструкција од камени плочи. Во црквата бил ѕидан и еден надгробен споменик - стела, а во западниот ѕид на другата црква, која се наоѓа во непосредната близина, е вѕидан натпис кој го споменува името на градот Аргос.